मुक्तक

–निरा भट्टराई

१
हतारको हतार छ जिन्दगीमा सधैँ भरी
रोकिएको छैन कोही हेर्छु आफ्नै वरिपरि
रवि चन्द्र जल वायु चक्रको नि आफ्नै गति
जहाँ चैन मिल्ला हाम्रो मूल्य हुन्छ ढुङ्गा सरी

२
जब आफ्नो मान्छेले नै आफ्नो भन्न छोड्ला
देखे पनि नदेखेझैँ बाटो अन्त मोड्ला
काँचसरि नाता तोड्न आफै अगि बढेपछि
टुटेको मन कुन तत्त्वले दाग नबसी जोड्ला

३
खोलाजस्तै बग्ने मन छ ठोकिन मन छैन
गन्तव्यमा नपुगुन्जेल रोकिन मन छैन
कसले जित्यो कसले हार्‍यो जिन्दगीको खेल
हार जीतको तराजुमा जोखिन मन छैन

४
तिम्रो बाटो हेर्दै बस्दा थाकिसके मेरा आँखा
टाढा टाढा बनिसके आफन्त नि सबै भाका
बिजुली झैँ बिलाई दिने बानी तिम्रो कस्तो
मेरै भन्छु भर पर्छु भाग्छौ तिमी डाँडा पाखा